डोंबिवलीतील ‘एमआयडीसी’येथील ‘अमुदान’ या रसायन कंपनीत गुरुवारी दुपारी बॉयलरचा भीषण स्फोट झाला. या दुर्घटनेत आत्तापर्यंत 11जणांचा मृत्यू झाला असून 65 हून अधिक कामगार गंभीर रित्या जखमी झाले. अमुदान या कंपनीच्या मालकाविरोधात गुन्हा दाखल करण्यात आला आहे.
डोंबिवलीतील ‘एमआयडीसी’येथील ‘अमुदान’ या रसायन कंपनीत गुरुवारी दुपारी बॉयलरचा भीषण स्फोट झाला. या दुर्घटनेत आत्तापर्यंत 11जणांचा मृत्यू झाला असून 65 हून अधिक कामगार गंभीर रित्या जखमी झाले आहेत. काल रात्री उशीरापर्यंत एनडीआरएफच्या टीमकडून येथे शोधमोहिम राबवण्यात येत होती. आज, शुक्रवारी सकाळी पुन्हा बचावकार्य सुरू करण्यात आले असून ढिगाऱ्याखाली अनेक जण अडकल्याची भीती व्यक्त करण्यात येत आहे.
दरम्यान या दुर्घटनेप्रकरणी आणखी एक मोठी अपडेट समोर आली आहे ती म्हणजे अमुदान या कंपनीच्या मालकाविरोधात गुन्हा दाखल करण्यात आला आहे. मालती प्रदीप मेहता आणि मलय प्रदीप मेहता यांच्या विरोधात सदोष मनुष्यवधाचा गुन्हा दाखल करण्यात आला आहे. काल दुपारी झालेल्या बॉयलरच्या स्फोटामुळे भीषण आग लागून दुर्घटना घडली.
NDRF च्या टीमकडून शोधमोहिम सुरू
NDRF च्या टीमकडून शुक्रवार सकाळापासून पुन्हा शोधमोहिम सुरू करण्यात आली. पाच गाड्या तेथे दाखल झाल्या असून रेस्क्यू ऑपरेशन सुरू झाले आहे. या दुर्घटनेत आत्तापर्यंत ११ जणांना जीव गमवावा लागला आहे. काल रात्रीपर्यंतचा आकडा हा ८ होता मात्र आज सकाळपासून आणखी तीन मृतदेह दुर्घटनास्थळी असलेल्या ढिगाऱ्याखालून काढण्यात आले आहेत. त्यामुळे मृतांची संख्या आता ११ वर पोहोचली असून आणखी बरेच ढिगाऱ्याखाली अडकल्याची शक्यता असून मृतांचा आकडा वाढण्याची भीतीही व्यक्त होत आहे.
काल दुपारच्या सुमारास झालेला हा स्फोट इतका भीषण होता की कंपनीच्या आसपासच्या परिसरातील अनेक बिल्डींगमधील घरांच्या काचा फुटल्या.तर काही ठिकाणी ग्रीलही दुभंगले. घरात काचांचा सडा पडल्याने अनेक जण जखमीही झाले. या स्फोटामुळे भीषण आग लागली होती, आगीचे लोळ एवढे मोठे होते की दोन किलोमीटर लांबूनही त्याची दृश्य दिसत होती, तीव्रता जाणवत होती. अखेर अग्निशमन दलाच्या जवानांनी अथक प्रयत्न करून आगीवर नियंत्रण मिळवले.
परिसरात पसरली दुर्गंधी
या घटनेमुळे परिसरातील इमारती, घरे आणि दुकानांचं नुकसान झालं आहे. जखमींमध्ये परिसरातील स्थानिकांचा देखील समावेश असल्याची माहिती मिळत आहे. स्फोटानंतर परिसरात एका बालरुग्णालयाचं काचेचं गेटचा चक्काचूर झाला. रुग्णालयाबाहेर काचेचा खच पडला आहे.
दरम्यान हा स्फोट जिथे झाला, त्या आसपासच्या परिसरात आता तीव्र दुर्गंधी पसरली आहे. या केमिकल कंपनीतील रसायनांमुळे ही दुर्गंधी पसरली असून त्यामुळे तेथील रहिवाशांना बराच मनस्ताप सहन करावा लागत आहे.